في لقاء تلفزيوني بعد سؤال ليش تزوجتي بعمر صغير ؟؟ الجواب صادم …

في لقاء تلفزيوني بعد سؤال ليش تزوجتي بعمر صغير ؟؟ الجواب صادم …

موقع نابلس الاخباري – اقلام وآراء

وانا عمري ١٥ سنة؛ تقدملي واحد عمره ٢٥ سنة، كان بشتغل بامريكا ووضعه منيح كثير، يومها اجت امي تباركلي

ما استشارتني حتى بالموضوع، كنت قاعدة يومها برسم بحلمي، اصير دكتورة وأعالج كل الناس !

حكتلها ماما بدي اكمل تعليمي، بتذكر دخل ابوي عالغرفة وقلي هاد فرصة العمر ، وفش بنات يكملو تعليمهم!

وقتها خبيت حلمي” رسمتي “ورا ضهري خفت يمزعولي ياها، وفعلا خطبت واستنتيت للعريس يجهزلي اوراقي، كنت اروح عالمدرسة اعيط، كل البنات حوالي بدرسو وعندهم احلامهم!

الا انا هاد اخر فصل الي بالمدرسة ….

خلص الفصل وتزوجت، ما بنكر كنت متهوسة للفستان الأبيض ، للسفر، وللحياة الحلوة…

واتنهدت تنهيدة طوووووويلة وسكتت ….

هون المقدمة حكتلها، طيب نخليكي ترتاحي شوي وبعدها تكملي ..

قالت : لا ما بدي ارتاح، رح اكملكم … بخاف تتزوج بنت بعمر صغير قبل ما اكمل الحلقة!

شربت كاسة مي، ونزلت دمعتها عحفة الكاسة، مسحتها وكملت!

صرلي عرسس كبير؛ ولبسني دهب كثير، ورقصت ، وخلص العرس وروحنا على بيت اهله يومها .

وبعد اسبوع سافرنا على امريكا، كانت اول مرة بطلع برا البلد، كنت بطلع عكل شي باعجاب رهيب؛ ومكيفة ونسيت احلامي وكل شي؛ بس وصلنا هناك بلش الكابوس!

يومها رجع الساعة ٢ و٤٥ دقيقة ولا عمري بنسى كان سكران كثير؛ فات عالغرفة، بضحك وبتهبل؛ انا لما شفته خفت! ما بعرف لي ، قمت اجيت بدي اطلع من الغرفة، سكرها وضربني!

ومن يومها بلش العذاب بحياتي!

المقدمة: طيب ما حكيتي مع اهلك؟

اتصلت علي امي ؛ حكتلها اني منيحة، ومبسوطة؛ كان صوتي مخنوق بس ما قدرت احكي شي، صار كل يوم يعذبني ؛ يجيب رجال عالبيت، الوضع صار لا يطاق؛وبعد ٦ سنين زواج! قررنا ننزل عالبلد؛ بس نزلنا، حكيت لاهلي الموضوع كله، وكيف بعذبني وبضربني؛ وكيف بجيب رجال؛ امي ما صدقتني ، وصارت تحكيلي اوعك تحكي هالحكي قدام ابوكي، يما انا بدي اطلق منه مشان الله ساعدوني، بس ولا حدا وافق ، رحت حكيت معه قلتلي طلقني، ضربني لحتى كسرني، واتصل عاهلي؛ وقلهم هاي بنتكم وحدة سافلة!

يومها اجو اهلي ، واستر عليها، ويفاوضو انه يسفرني!

بس هالمرة انا بطلت صغيرة، مش رح اسمح لحدا يخربلي حياتي، لا اهلي ولا حدا…
استنيت لليل، حمبت اغراضي وهربت!
بعد سنة سجلت بالمدرسة وكملت تعليمي، دخلت كلية الطب؛ وانا هيني بسنة ثالثة طب حاليا ، طلعت رسمتها ، وورجتها للكل، انا عشان هالحلم رح حارب لاخر نفس!

المقدمة ودمعة بعيونها صفقتلها ؛ وبصوت مخنوق كلمة للبنات الي بعمر صغير ولللاهل!

كلمتي للاهل، اتقوا الله في بناتكم، انتو ما جبتوهم على الدنيا لتخسروهم؛ وتذلوهم ببيوت زواجهم؛ المصاري مش سعادة دائما ؛ صح الواحد ما بقدر يعرف الزوج منيح او عاطل، بس بعمر كبير هي بتكون قد قرارها+ وعارفة كيف تتصرف!

وللبنات الي بعمر صغير؛ في مراحل بالحياة لازم تعيشوها كاملة ، المدرسة، الجامعة والشغل؛ لا تستعجلي وتتزوجي عشان فستان ابيض؛ ولا تنغري بالغربة انه حلوة وبتطلعي من بلدك!

الغربة مغمسة بالدم احيانا، وخاصة اذا طلع زوجك مش منيح، رح تنامي كثيؤ والدمعة بعينك، وتصحي تحكي لامك كل شي حلو ومنيح

اكيد مش كل الي تزوجوا بعمر صغير ما عاشوا حياتهم؛ وكمان مش كل حدا اتغرب كان مش منيح مع مرته بس ليش نرمي بناتنا !

#هديل_قاسم

Related posts

Leave a Comment